Кыргызстандык Айжан Съездбекова шахмат боюнча он жашка толо элек кыздар арасында Азия чемпионатында алтын медаль утту. Өлкөнүн Шахмат федерациясы билдиргендей, ал шахматтын классикалык түрүнөн мүмкүн болгон 9 упайдан 8,5 упайды топтоду.
8-18 жаштагылар арасында шахмат мелдеши ушул күндөрү Шри-Ланканын Калутара шаарында өтүп жатат. Кыргызстандан 16 спортчу барган.
Айжан 8 жашта. Атасынын айтымында, 5 жашар кезинде Монголияда өткөн Азия чемпионатында шахматтын классикалык түрүнөн күмүш байге алган. Былтыр Таиландда Азия чемпионатынан 8 жашка чейинкилер арасында шахматтын рапид түрүнөн Азия чемпиону болгон. Ушул эле мелдеште шахматтын блиц түрүнөн күмүш медал тагынган. Кыргызстандын 4 жолку чемпиону. Президенттик кубоктун 3 жолку жеңүүчүсү. Балдар жана кыздар арасында аралаш өткөн Карпов кубогунун ээси. 2018-жылы Ташкентте өткөн Батыш Азия чемпионатында шахматтын классикалык түрүнөн күмүш, блиц түрүнөн алтын байге алган.