Казакстандын бийликтеги «Нур-Отан» партиясы президенттикке талапкерин эки жумага жетпеген убакыттын ичинде тандайт. Дээрлик 30 жылдан кийин мамлекеттик башчылыктан кетсе да, партиянын төрагасы бойдон калган экс-президент Нурсултан Назарбаев 10-апрелде билдирүү таратып, «Нур-Отан» партиясы 23-апрелде кезексиз курултайын өткөрөрүн маалымдады. Андан бир аз мурда Назарбаев Нур-Султан шаарында партиялаштары менен жыйын өткөрүп, «Нур-Отандын» талапкери партиянын кийинки курултайында белгилүү болоорун айткан.
Бир күн мурда Казакстандын президенти Касым-Жомарт Токаев Казакстанда мөөнөтүнөн мурда шайлоо 9-июнда өтөөрүн жарыялаган. «Нур-Отан» партиясына мүчө болгон Токаев 20-мартта ант берип, президенттиктен кеткен Назарбаевдин ордун баскан. Ал шайлоого катышар-катышпасын азырынча айта элек.
78 жаштагы Назарбаев Казакстандын Коопсуздук кеңешин өмүрүнүн акырына чейин жетектейт. Анын «элбашы» деген макамы өзүн жана үй-бүлөсүн кылмыш жоопкерчилигинен бошотот.
Назарбаевдин тун кызы Дарига Назарбаева казак парламентинин Жогорку палатасынын спикери болуп шайланган. Ага чейин бул кызматты Касым-Жомарт Токаев аркалап келген.
