Украинанын президенттигине эки талапкер Батыш Европа өлкөлөрүнүн лидерлери менен өз-өзүнчө жолукканы жатышат.
12-апрелде Франциянын президенти Эммануэл Макрон Парижде Владимир Зеленскийди кабыл алып, кийин президент Петро Порошенко менен кездешмекчи. Ушул эле күнү Порошенко Берлинде Германиянын канцлери Ангела Меркел менен жолугушат.
Франция жана Германия Украинанын чыгышындагы куралдуу жаңжалды жөнгө салуу боюнча «Норман квартетине» киришет. Алардан тышкары Украина жана Орусия да катышкан бул топ 2 жылдан бери сүйлөшүү жүргүзө элек.
Бейшемби күнү жарык көргөн жаңы сурамжылоого караганда, куудул Зеленский 21-апрелдеги шайлоо алдында Порошенкодон кыйла алдыда баратат. Биринчи айлампаны Зеленский чоң ажырым менен жеңген.
