Кыргызстанда эмгекке жарамдуу калктын 23% айыл жериндегилер түзгөнү менен бул тармактагы абал учур талабына жооп бербей жатат. Бул тууралуу бүгүн парламентте сүйлөп жатып премьер-министр Мухаммедкалый Абылгазиев билдирди:
- Айыл чарбасы бүгүн мезгил талаптарына жооп бербейт. Уюштуруу системасы чаржайыт. Чарба жүргүзүүчү майда субъектилер көп. Өндүрүү, кайра иштетүү сыяктуу чынжырда инновациялык агромаркетинг жок. Мунун айынан аймактарда социалдык-экономикалык абал жакшы эмес. Инфратүзүмү, мүмкүнчүлүктөрү жана туризмдин дарамети толук пайдаланылбайт.
Расмий статистикага караганда, Кыргызстанда жалпы элдин 60% айыл калкы.
Быйыл картөшкө айдаган дыйкандар өндүрүмүн сата албай, көбү чыгымга учурады.
Өкмөт башчы белгилегендей, соңку жылы өлкөнүн ички дүң өнүмү 557 млрд. сомду түзүп, курулушта 7,8%, өнөр жайында 5,5%, айыл чарбасында 2,7% өсүш катталды. (RK)
