Бул тууралуу парламенттеги «Бир Бол» фракциясынын лидери, талкууланып жаткан мыйзам долбоорунун авторлорунун бири Алтынбек Сулайманов 7-майда уран маселеси боюнча коомдук талкууда билдирди.
Ушул тапта Жогорку Кеңеште Кыргызстандын аймагында геологиялык-издөө, чалгындоо иштерине жана уран, торий чыккан жерлерди иштетүүгө тыюу салуу боюнча мыйзам долбоору тууралуу коомдук талкуу өтүп жатат.
Аталган мыйзам долбоорунун авторлору - депутаттар Алтынбек Сулайманов, Алмамбет Шыкмаматов жана Канат Керезбеков.
Жогорку Кеңеш 2-майда республика аймагында уран кендерин чалгындоого жана казууга тыюу салуу тууралуу токтом кабыл алган. Төрага Дастанбек Жумабеков Ысык-Көлдөгү Кызыл-Омпол боюнча маселе талкууланган жыйында парламент саясий чечим кабыл алганын билдирген.
Мунун алдында жарандык активисттер, жергиликтүү тургундар Кызыл-Омпол кенинде уран чалгындоого каршы Бишкекте, Балыкчыда, Караколдо катар-катар митингдерди өткөрүшкөн.
Президент Сооронбай Жээнбеков 4-майда Конституциялык палатанын судьяларын кабыл алганда акыр-аягы уран чуусуна байланыштуу үн катып, «Кыргызстанда уран казылбайт!» деп билдирген. (EBM/ZKo)
