Европанын Чемпиондор лигасынын алкагында жарым финалдык оюндардын жооптуу беттеши башталып, Англиянын «Ливерпуль» клубу өз үйүндө Каталониянын «Барселона» командасын кабыл алды.
«Ливерпуль» бир жума мурда «Барселонага» 3:0 эсебинде утулгандыктан, финалга жолдомо алыш үчүн кеминде төрт гол киргизүү милдети турган. Натыйжада Англиянын клубу түндө бул милдетти аткарып, Ориги менен Вейналдумдун экиден голдору «Ливерпулга» 4:0 эсебин камсыз кылып берди.
Ал эми курамында дүйнөнүн беш жолку мыкты оюнчусу Леонел Месси баш болгон «Барселона» бул оюнда гол киргизе албай, Чемпиондор лигасынан четтеди.
Бүгүн Чемпиондор лигасынын жарым финалынын алкагында экинчи жуптун оюну болот. Анда Голландиянын «Аякс» клубу өз үйүндө Англиянын «Тоттенхем» командасын кабыл алат. Бул эки команданын биринчи оюну 1:0 эсебине «Аякстын» жеңиши менен аяктаган. (SDz)
