Сагынбек Абдырахманов өзү төрагалык кылган Кыргызстан социал-демократиялык партиясынын (КСДП) атынан эки адам жергиликтүү кеңешке депутат болуп барганын билдирди. Бул тууралуу Абдрахманов «Азаттык» радиосунун «Эки бир» көрсөтүүсүндөгү суроолорго жооп берип жатканда айтты:
- Фракциялар менен акылдашып, кеңешип, Ош шаарына жана Жалал-Абадга эки депутат менин колум коюлган кагаздын негизинде барды. Борбордук шайлоо комиссиясы менен да иштешип жатабыз.
«Азаттык» ал депутаттардын аты-жөнү ким экенин тактоого аракет кылып жатат.
Абдрахманов мурда «Атамбаевсиз КСДП» кыймылын жетектеген. Юстиция министрлиги Атамбаев төрагалык кылган КСДПнын төрагасы катары Сагынбек Абдрахмановду 18-апрелде каттаган жана партиянын дареги да өзгөртүлгөн. Ал эми экс-президент Атамбаев жана анын тарапташтары муну мыйзамсыз чечим деп жатышат.
Юстиция министрлигинин чечими чыкканы менен Сагынбек Абдрахманов мөөрдү Алмазбек Атамбаев башкарып жаткан партиядан ала элек. (SE)