Пакистандын премьер-министри Имран Хан Индиянын өкмөт башчысы Нарендра Модини парламенттик шайлоодогу жеңиши менен куттуктап, Түштүк Азиядагы «тынчтык жана бейкуттук» үчүн чогуу иштешүүгө дилгир экенин билдирди.
Имран Хан бул тууралуу 23-майда «Твиттерге» жазды. Баштапкы жыйынтыктарга караганда, Модинин улутчул партиясы алдыда баратат. Индия менен Пакистандын өз ара мамилелери 1947-жылы Британиядан өз алдынчалык алгандан бери оңой болгон эмес.
Өзөктүк куралы бар бул эки атаандаш өлкө үч согушту башынан кечирген. Талаштуу Кашмир аймагында маал-маалы менен атышуу болуп турат.
Хандын куттуктоосунун алдында эле Пакистандын аскерлери баллистикалык ракетаны сынашканын билдиришкен. Ага чейин Индия дүйнөдөгү эң ылдам деген ракетасын сыноодон өткөргөн.
