Кыргызстандын өкмөт башчысы Мухаммедкалый Абылгазиев Улуттук көчмөндөр оюндарын өткөрө турган уюштуруу комитетинин даярдыгы менен таанышты.
- Көчмөндөр оюндарынын алкагында өткөрүлүүчү спорттук мелдештер, маданий иш-чаралар улуттук маданияттын сакталышына жана өнүгүшүнө багытталган. Биз дагы бир жолу дүйнөгө өзүбүздүн маданиятыбыздын байлыгын, жаратылышыбыздын кооздугун көрсөтүшүбүз керек. Бул жолку Улуттук көчмөндөр оюндарын Талас облусунда өткөрүү чечилген, - деди өкмөт башчы.
Оюндар Талас шаарынын ипподромунда жана улуттук «Манас-Ордо» комплексинде өтүп, анын жанында этнобазар уюштурулат.
Жыйында оюндар өтчү жерлерди жана башка инфратүзүм объектилерин оңдоп-түзөө маселелери да талкууланды.