АКШнын мамлекеттик катчысы Майк Помпео Оман булуңунда эки кемеге жасалган чабуул үчүн Иранды айыптады.
13-июнда болгон бул окуя эки өлкө ортосунда дипломатиялык чыңалуу күчөп турган чакта катталды.
Помпео бул ишке Иран айыптуу деген бүтүмгө чалгын кызматынын маалыматтары менен таанышкандан кийин келгенин билдирди:
- Ирандагы режим биз тараптан жасалып жаткан басымды азайткысы келет. Бир дагы экономикалык санкция Ирандын бийлигине бейкүнөө адамдарга кол салуу, мунайдын дүйнөлүк базарын бузуу жана ядролук коркутуп-үркүтүүгө катышуу укугун бербейт.
Иран Вашингтондун бул айыптоолорун четке кагууда.
“Кимдир бирөө Ирандын эл аралык коомчулук менен мамилесин бузгусу келип жатат” деп билдирди өкмөттүн өкүлү.
13-июнда Оман булуңунда мунай ташыган эки кемеге чабуул жасалган. Ошол эле күнү мунайдын дүйнөлүк баасы 4% жогорулаган. (RK)
