Линктер

ЧУКУЛ КАБАР!
6-Декабрь, 2021 дүйшөмбү, Бишкек убактысы 15:43

Грузия: Маргелашвили акциянын катышуучуларын колдоду


Георгий Маргвелашвили.

Тбилисиде оппозиция лидерин камоо коркунучунан улам Орусияга каршы нааразылык акциясы алтынчы түн ичинде да уланды. Миңдеген адамдар ички иштер министринин кызматтан кетишин талап кылышууда.

25-июндун кечинде Грузиянын мурдагы президенти Георгий Маргелашвили парламент алдындагы акциянын катышуучуларына кайрылып, «азыр көрүп турган, жаңы тарыхы жазылып жаткан Грузия менен, аянтта тургандар менен сыймыктанарын» билдирди. «Бул тарых кан менен жазылып жатканы өкүнүчтүү» деди ал.

- Ушул аянтта чындык жана күч бар. Ушул жерде Грузиянын жаркын келечегине болгон каалоо-тилек бар. Силердин өз талаптарыңар үчүн бекем турганыңар маанилүү. Бул сөзсүз түрдө жеңишке алып барат, - деди экс-президент.

Мындан сырткары ал мурдагы муундун жаңылыштыгын кайталабоого үндөп, Грузиянын эл аралык өнөктөштөрүнө да кайрылды.

- Биздин өнөктөштөр Орусия идеологиялык күрөштө жеңип жатканын көп айтышат. Бүгүн мен жаңы Грузияны көрүп кетүүгө чакырам, - деди ал.

Мындай нааразылыкка орусиялык депутат, коммунист Сергей Гавриловдун өткөн аптада Тбилисидеги сапары учурунда парламент спикеринин ордуна отурганы себеп болгон. Гаврилов Грузияга Православ парламент аралык ассамблеясына төрагалык кылыш үчүн барган.

Муну Грузияны сыйлабастык катары баалаган демонстранттар Москванын саясатын кескин айыптап, грузин бийлигинен шайлоо системасын өзгөртүүнү талап кылууга өтүшкөн. Нааразылыктын биринчи күнүнөн кийин грузин парламентинин төрагасы Ираклий Кобахидзе кызматтан кеткен.

Бирок митингчилер кеңири талаптары аткарылмайынча, каршылык акциясы улана берерин билдиришүүдө. Алар ички иштер министринин кызматтан кетишин жана 20-июнда демонстранттарга күч колдонгон полиция кызматкерлерин жоопко тартууну да талап кылып жатышат.

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG