Ысык-Көлдөгү "Хан-Теңири" лагеринде эки кишини өлтүрүп, бир адамды барымтага алды, деп шек саналган адам кармала элек. Облустук милициянын басма сөз кызматы издөө уланып жатканын билдирди.
4-июлда «Хан-Теңири» альплагеринде бир киши эки адамды атып өлтүрүп, үчүнчүсүнө бычак сайып, бир аялды барымтага алып качып кеткени кабарланган. Барымтадагы аялды бошоткон. Бычак жеген адамга медициналык жардам көрсөтүлгөн.
Окуя Ак-Суу районундагы Сырт өрөөнүндө жайгашкан «Хан-Теңири» лагеринде болгон.
Кылмышка ошол эле лагерде иштеген Сергей Смирнов аттуу киши шектүү катары изделип жатат.
Кол салууга туш болгондор ошол лагердин кызматкерлери экени айтылган.
