Линктер

ЧУКУЛ КАБАР!
8-Май, 2021 ишемби, Бишкек убактысы 14:42

Ирактагы кыргызстандык балдарды алып келүү маселеси талкууланды


Ракка шаарынан качкан аялдар. 5-апрель, 2017. Сирия.

Тышкы иштер министри Чыңгыз Айдарбеков жана БУУнун Балдар фондунун (ЮНИСЕФ) Кыргызстандагы өкүлү Кристин Жольмд Ирактагы кыргызстандык балдарды алып келүү маселесин талкуулашты. Жольмд өзү жетектеген уюм балдарды Ирактан кайра алып келүүнү уюштуруу иштерин колдоого даяр экенин айтты.

Бул багытта башка өлкөлөрдүн тажрыйбасын изилдөө зарылдыгын жана алып келинген балдарды коомго аралаштыруунун маанилүүлүгүн белгиледи. Министр Айдарбеков бул ишке колдоо көрсөтүп жатканы үчүн ЮНИСЕФке ыраазычылык билдирип, балдардын реинтеграциясы үчүн уюм көмөк көрсөтөөрүнө ишеним артты.

Тышкы иштер министри Чыңгыз Айдарбеков Кристин Жольмду БУУнун ЮНИСЕФтин Кыргызстандагы өкүлү болуп дайындалышына байланыштуу 31-июлда кабыл алды. Тараптар өз ара кызматташтык, балдардын укуктары менен кызыкчылыгын коргоо багытындагы долбоорлорду талкуулашты.

Тышкы иштер министрлиги буга чейин Сирия жана Ирактагы кыргызстандыктарды алып келүү боюнча иштер жүрүп жатканын айткан. Маалыматка караганда, ал жактагы жарандардын санын тактоо иштери жүрүп жатканын белгиледи.

Улуттук коопсуздук боюнча мамлекеттик комитеттин маалыматына караганда, ушул күнгө чейин Сириянын согуш жүргөн аймактарына баш-аягы 800дөй кыргыз жараны кеткен. Анын ичинен 200дөн ашыгы курман болгон. Террордук топторго кошулуп кеткен кыргызстандыктардын 140ка жакыны аялдар экени айтылып жүрөт. Көбү 2013-2015-жылдардын аралыгында кетип калышкан.

Казак өкмөтү 2019-жылы жарандарын артка кайтаруу жаатында үч этаптагы операция аткарып, 524 кишини мекенине алып келди. Анын 357си балдар, 137си аялдар. Өзбекстан май айынын соңунда 156 жаранын, негизинен аялдар менен балдарды алып келди. Тажикстан 84 баланы ата журтка кайтарды. Бул тууралуу 29-июлда Бишкекте Кыргызстан, Өзбекстан, Тажикстан жана Казакстандын мамлекеттик, бейөкмөт уюмдарынын адистери, эксперттер катышкан конференцияда айтылды. (КЕ)

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG