Линктер

шаршемби, 23-октябрь, 2019 Бишкек убактысы 12:34

Чуулгандуу мушташ: шектүүлөрдүн милициядагы тууганы 10-ноябрга чейин камалды


Мушташ тартылып калган камерадан алынган сүрөт.

12-сентябрда Биринчи май райондук сотунун чечими менен мурдагы милиция кызматкери Казыбек Бапышов 10-ноябрга чейин, Улуттук коопсуздук боюнча мамлекеттик кызматтын тергөө абагына камалды. Бул тууралуу милиция кабарлады.

11-сентябрда Улуттук коопсуздук боюнча мамлекеттик комитеттин (УКМК) ыкчам издөө иштеринин алкагында Чүй облустук ички иштер башкы башкармалыгынын Криминалдык милиция кызматынын, уюшкан кылмыштуулукка каршы күрөш бөлүмүнүн мурдагы кызматкери Казыбек Бапышов кармалганы кабарланган.

Ал 28-августта Бишкек шаарындагы Ахунбаев-Курчатов көчөлөрүнүн кесилишинде эки адамды катуу сабап, өмүрүнө коркунуч келтирди деп кармалган бир туугандар Жаныбек Бапышев менен Калысбек Сейитбековдун тууганы. Милицияда иштеп турган учурда Казыбек Бапышов окуя болгон жерге жетип барып, жакын туугандарын кармаган милиция кызматкерлерине тоскоолдук кылып, инилерин бошотуп кеткен деп шек саналууда. Бул окуядан кийин ал кызматынан бошотулган.

Жаныбек Бапышев менен Калысбек Сейитбеков кийин милицияга өздөрү келип, камакка алынган. Мушташ болгондон кийин аларды милиция бөлүмүнө алып келип, кийин бошотуп жиберген Бишкектин Ленин райондук милициясынын эки кызматкери да кармалып, кайра үй камагына чыгарылган.

Ушул айдын башында эки жигиттин катуу сабалганы тартылып калган видео социалдык тармактарга тарап, кызуу талкууга алынган. Анда сабалгандардын бири катуу соккудан эсин жоготуп жыгылган. Каршылык көрсөтүүгө аракет кылган экинчиси аёосуз тепки жегенин көрүүгө болот. Окуя 28-августта болгону аныкталган.

Мушташ окуясы Бишкек шаарынын Ленин райондук прокуратурасы тарабынан Жазык кодексинин 320-беренеси («Кызмат абалынан кыянаттык менен пайдалануу») жана 348-беренеси («Кылмышты жаап-жашыруу») менен Кылмыштардын жана жоруктардын бирдиктүү реестрине катталган. (TSh)

Пикирлерди көрүңүз (2)

Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.
XS
SM
MD
LG