Премьер-министр Мухаммедкалый Абылгазиев Нарын облусундагы «Торугарт» көзөмөл-өткөрмө жайынын жана Мамлекеттик чек ара кызматынын иши менен таанышты. Бул тууралуу өкмөттүн басма сөз кызматы маалымдады.
Анда Мамлекеттик бажы кызматынын төрагасы Алтынбек Торутаев «Торугарт» көзөмөл-өткөрмө жайында Евразия Экономикалык Биримдигинин стандарттарына карата модернизациялоо иштери аягына чыгып, жаңы алынган жабдуулар ишке киргизгенге даяр турганын билдирди. Орусия «Торугарт» көзөмөл-өткөрүү пунктуна материалдык-техникалык жабдуу үчүн 120 млн. доллар бөлгөн.
Мухаммедкалый Абылгазиев жаңыланган өткөрмө пункттары Мамлекеттик бажы кызматы ыкчам жана таза иштешине шарт түзөрүн баса белгиледи:
- Айрым жарандарыбыз Мамлекеттик бажы кызматынын ишине кандайдыр ишенбестик менен мамиле кыларын бардыгыбыз билебиз. Алар бажы жыйымдарынын бөлүгү кассадан тышкары кетет деп эсептешет. Биз мындай күмөндүн негизин жоюп, бажынын иши ачык-айкын, тунук экендигин көрсөтүүгө тийишпиз. Мында бардыгы онлайн режимде болушу керек.
Өкмөттүн маалыматы боюнча өлкө аймагындагы 14 көзөмөл-өткөрмө бекетинин ичинен 12си модернизацияланган. Алардын алтоо стационардык инспектордук-көрүү комплекси менен жабдылган. 5-ноябрда Оштогу «Эркечтам» өткөрмө бекетиндеги ушундай комплекстин ачылышы болот.
Бекет 1996-жылдан бери иштейт жана эл аралык макамга ээ болгон. Мында мамлекеттик көзөмөлдүн чек ара, бажы, транспорттук, медициналык, санитардык-карантиндик, ветеринардык жана фитосанитардык түрлөрү жүргүзүлөт. (TSh)