Ички иштер министрлигинин (ИИМ) Мамлекеттик адистештирилген күзөт кызматынын башчысы Талантбек Исаевге карата жүргүзүлүп жаткан сотко чейинки өндүрүш токтотулду. Бул тууралуу бүгүн, 4-декабрда Улуттук коопсуздук боюнча мамлекеттик комитет (УКМК) кабарлады.
Мекеменин басма сөз катчысы Рахат Сулайманов билдиргендей, буга Ички иштер министрлигинен келген жооп негиз болду.
- Анда Исаев үстөк пайызсыз насыя алууда мыйзам бузбаганы, себеби «Ички иштер органдары жөнүндө» мыйзамда ишкердикке байланышпаган максатта насыя алуу мыйзамга каршы келбей тургандыгы айтылат, - деди атайын кызматтын өкүлү.
УКМК «Териштирүүнүн натыйжасында Исаев кылмыш кылбаганы аныкталды. Ошол себептен 3-декабрда ага карата сотко чейинки өндүрүш токтотулду» деп билдирди.
Исаевге карата иш быйыл 23-октябрда Жазык кодексинин 320-беренеси («Кызмат абалынан кыянаттык менен пайдалануу») менен сотко чейинки өндүрүшкө алынган.
Атайын кызмат Исаевдин иши ал 2011-жылы «Манас Менежмент» компаниясында иштеп турган учурдагы каржылык маселеге байланыштуу иликтенип жатканын билдирген.
24.kg агенттигине Талантбек Исаев кылмыш иши боюнча комментарий берип, 2011-жылы ал компания менчик болгондуктан эч кандай кызмат абалынан пайдаланбаганын маалымдаган. Талантбек Исаев - Жогорку Кеңештеги депутат Канатбек Исаевдин бир тууган агасы. (TSh)
