Линктер

ЧУКУЛ КАБАР!
ишемби, 7-декабрь, 2019 Бишкек убактысы 16:04

ЭлТР «Азаттык» радиосунун иликтөөсүн эфирге чыгаруудан баш тартты


ЭлТР телеканалы «Азаттык» радиосунун «Көмүскө акча ташыгандар кербени» аттуу жаңы иликтөөсүн эфирге чыгаруудан 4-декабрда баш тартты.

Телеканалдын жетекчиси Айбек Мусаев мындай жүйө келтирди:

- Бүт баары расмий, бир тараптуу жасалган. Монолог. Алып баруучунун гана монологу. Азыр тергөө жүрүп жатат, ошондуктан биз муну бере албайбыз. Бул менин жеке пикирим. Бизде жамааттык форма бар. Ошол карап, бир тараптуу деп тапты. Силер жибергенден баштап карады.

«Азаттык» 29 мүнөт 53 секундалык иликтөөнү телеканалга 4-декабрда 17:54дө жиберген. Эфирге 20:00дө берилмек.

Иликтөөдө нак акча ташыгандардын түйүнү жылдар бою миллиондогон долларды Кыргызстандан мыйзамсыз чыгарып турганы, көмүскө акча агымы коррупцияны күчөтүп, мамлекеттик казынага зыян келтирип, адам өлүмүнө да себепчи болуп келгени баяндалат. «Бул система кандай иштейт, ким калкалайт?» - деген суроого жооп изделген.

Иликтөөнү «Азаттык» радиосу, «Уюшкан кылмыштуулукту жана коррупцияны иликтөө долбоору» жана «Kloop» порталы чогуу жасады. Бул системанын ийне-жибине чейин билиш үчүн декларациялардын, авиакаттамдардын, Мамлекеттик чек ара кызматынын маалыматы жана башка документтери текшерилип, бир катар интервьюлар алынды.

Программанын текст жана видео түрүндө azattyk.org сайтына чыкты. «YouTube» порталына, социалдык тармактарга жайгаштырылды.

Быйыл 21-ноябрда «Азаттык» радиосу, «Уюшкан кылмыштуулукту жана коррупцияны иликтөө долбоору» (OCCRP) жана анын Кыргызстандагы өнөктөшү «Kloop» маалымат агенттиги чогуу жүргүзгөн «Бажыдагы миллиондор: карактоо жана калкалоо» деген иликтөө жарыяланган. Анын негизинде күч органдары териштирүү баштаган. ЭлТРдин жетекчиси "тергөө жүрүп жатат" деп ушуну айтты.

"Азаттык" радиосунун жарым сааттык телепрограммалары келишимдик негизде иш күндөрү ЭлТРде 2016-жылдан бери көрсөтүлөт. (SE)

Пикирлерди көрүңүз (86)

XS
SM
MD
LG