Линктер

ЧУКУЛ КАБАР!
ишемби, 22-февраль, 2020 Бишкек убактысы 00:03

Сузакта күйөөсү токмоктогон келин ооруканада жатат


Иллюстрациялык сүрөт.

Сузак районунун Ынтымак айылында күйөөсү токмоктогон 34 жаштагы келин райондук оорукананын сынык жарат бөлүмүндө дарыланып жатат. Аталган оорукананын өкүлдөрү «Азаттыкка» билдиргендей 14-январда жаткырылган бейтаптын мээси чайкалып, мурдунан жаракат алган. Мындан сырткары эки көзүнүн тегерегинде көк ала издер да бар.

Жалал-Абад облустук ички иштер башкармалыгынын басма сөз кызматынын маалыматына караганда, окуя 13-январда күндүзү катталган.

«Аялдын арызынын негизинде Жазык кодексинин «Ээнбаштык» беренеси менен сотко чейинки өндүрүш иши ачылып, тергөө амалдары жүргүзүлүп жатат. Токмоктолгон келинге соттук-медициналык экспертиза дайындалып, анын жыйынтыгына жараша окуяга юридикалык баа берилет», деп айтылат маалыматта.

Айылдаштарынын айтымында 4 балалуу келин Ынтымак айылында күйөөсү менен көп жылдан бери батирде турушат. Зомбулук фактылары бул үй-бүлөдө буга чейин да катталып турган. Өзү айылдагы мектепте мугалим, күйөөсү ошол эле жерде күзөтчү болуп иштейт.

Ички иштер министрлигинин маалыматына караганда, үй-бүлөдөгү чыр-чатактардын жана аялдарга карата зомбулук фактыларынын 70% аракечтикке байланыштуу. Өткөн жылы үй-бүлөлүк зомбулук боюнча 8159 арыз катталса, алардын 554 гана сотко жөнөтүлгөн. 7045 иш тосмо арыз жазылгандыктан кыскартылган. (RsK)

XS
SM
MD
LG