Куткаруучулар Баткенде көмүр шахталарынын биринде газ чыгып жатканына байланыштуу түзүлгөн кооптуу абалды жөнгө салышты.
Өзгөчө кырдаалдар министрлигинин маалыматына караганда, окуя Сүлүктү шаарынын аймагында 10-мартта болгон. Куткаруучулар «Ибрагимов» шахтасына тосмо орнотуп беришкен. Жалпысынан 10 куткаруучу тартылган.
5-мартта Сүлүктүдөгү «Узун-Сай» ишканасында адистер өрттү өчүрүп, газ чыккан жерге тосмо орнотуп беришкен.
Мамлекеттик экотехинспекциянын маалыматына караганда, 2018-жылы Кыргызстанда тоо-кен тармагындагы ишканаларда 20 кырсык катталып, жети жумушчу каза тапкан, 13ү оор жараат алган. 2019-жылдын октябрына чейин алты кырсык катталып, үч жумушчу каза тапкан жана үчөө оор жараат алган. Ошол эле жылдын 10-декабрында Сүлүктү шаарындагы шахтада газга ууланып төрт киши каза болгон. (RK)
