Республикалык штаб Тышкы иштер министрлигинин маалыматына таянып, Ирандын аймагында калып калган айдоочулардын маселеси чечилип, алар мекенине кайтып келатканын маалымдады.
Штабдын маалыматы боюнча, учурда 60 айдоочунун 21и Орусияда турушат. Алар орус-казак чек арасындагы “Караозек” көзөмөл-өткөрмө бекетине багыт алышты. Ал эми 10 жүк ташуучу машине Азербайжан-Орусия чек арасындагы “Самур” көзөмөл-өткөрмө бекетинен өтүү үчүн кезекте турушат. 25 жүк ташуучу автоунаа Казакстан аркылуу Кыргызстанга келатат. Бир айдоочу Казакстандын жараны болгондуктан орус-казак чек арасында карантинге алынды.
Тышкы иштер министрлиги айдоочулардын маселеси көзөмөлдө экенин, алар менен байланышта турганын маалымдады.
Иран-Түркмөнстан чек арасында коронавируска байланыштуу карантинде камалып калган кыргыз айдоочулары алып кетүүнү суранып, президент Сооронбай Жээнбековго кайрылган. Бул айдоочулардын баары Кыргызстанга кайтканда обсервацияга алынары кабарланган. (TSh)
