Өлкө аймагында өзгөчө кырдаалга байланыштуу облустук штабдын чечими менен Ысык-Көлгө жарандардын жана автоунаалардын каттамына чектөө киргизилди. Бул тууралуу республикалык штабдан маалымдашты.
Район, шаар аралык зарыл эмес каттамдарга да убактылуу чектөө коюлду. Өзгөчө кырдаал учурунда ооруканалар, дарыканалар, азык-түлүк сатуучу жайлар, жергиликтүү өз алдынча башкаруу органдары жана мамлекеттик мекемелер кадимки тартипте иштейт.
Учурда Ысык-Көл облусунун аймагынын кире беришинде күнү-түнү иштей турган эки санитардык-карантиндик көзөмөл посту орнотулду. Анда дарыгерлер, милиция, Өзгөчө кырдаалдар министрлигинин кызматкерлери, жергиликтүү бийликтин өкүлдөрү нөөмөттө турушат.
Кыргызстанда 22-марттан тарта коронавирусту жайылтпоо максатында өзгөчө кырдаал режими киргизилген. Бул режим бир айга созулат. Анын алкагында бир катар чектөөлөр киргизилери айтылган. (TSh)
