Жапониянын маалымат каражаттары Эл аралык Олимпиада комитети менен Токио Олимпиадасынын уюштуруучулары эмки жайкы оюндардын мөөнөтүн тактап жатышканын 29-мартта жазышты.
Кабарларга караганда, Олимпиада пландалгандан туура бир жылдан кийин башталышы ыктымал.
Өткөн аптада коронавирус пандемиясынан улам быйылкы Олимпиаданы кийинкиге калтыруу тууралуу чечим кабыл алынган. Олимпиада 24- июлдан 9-августка чейин өтмөк. Эми 23-июль - 8-август деген күндөр каралууда.
Олимпиаданын азыркы тарыхында оюндар 124 жылдан бери белгиленген мөөнөттөн жылдырыла элек болчу. Бир нече жолу мелдештер, анын ичинде Токио-1940 Олимпиадасы согушка байланыштуу үзгүлтүккө учураган.
