Парламент депутаттары отурумда Кыргызстандагы эпидемиологиялык абалга байланыштуу зарыл болгон мыйзам долбоорлорун карашат. Жогорку Кеңештин басма сөз катчысы Ибраим Нуракун уулунун «Азаттыкка» билдиргенине караганда, мыйзам долбоорлору насыя жана салык маселелерине байланыштуу.
«Азыркы эпидемиологиялык кырдаалга байланыштуу айрым мыйзам долбоорлоруна чукул өзгөртүү киргизип, бекитүү зарылчылыгы чыгып жатканына байланыштуу депутаттар кезексиз жыйынга чогулуп, ошол мыйзамдарды карашат», - деди ал.
Ибраим Нуракун уулунун айтымында кезексиз жыйынга чогулуучу депутаттардын жана мыйзам долбоору жөнүндө түшүндүрмө берүүчү баяндамачылардын да коопсуздук чаралары каралган. Отурумга журналисттер катышпайт, жыйын телеканалдардан жана соцтармактардагы парламенттин баракчаларынан түз көрсөтүлөт.
Өлкөдө өзгөчө абал киргизилгенине байланыштуу Жогорку Кеңештин депутаттары 25-марттан тартып аймактарда шайлоочуларга түшүндүрүү иштерин жүргүзүү үчүн тыныгуу алышкан. (ZKo)
