Кыргызстанда 8-апрелден тартып IV чейректин сабактары КТРКнын “Баластан” (1-4-класстын окуучулары жана бала бакчалардын бүтүрүүчү тайпалары үчүн), ЭлТРдин “Илим Билим” (5-11-кластын окуучулары үчүн) жана "Санат", "Пирамида", 5-каналдары аркылуу эфирге берилет. Бул тууралуу Билим берүү жана илим министрлигинин басма сөз кызматы маалымдады.
Учурда видеосабактар тартылып, монтаждалып жатат. Видеосабактарды тартууга 210 мугалим катышкан. Ушул эле видеосабактар, окуу материалдары, электрондук китептер, кошумча адабияттар, тапшырмалар, мугалимдер үчүн колдонмолор, өнүктүрүүчү оюндар, тесттер министрликтин oku.edu.gov.kg порталына жүктөлөт. Ошондой эле “МЕГА 24” тиркемесинде да жайгаштырылат.
“Мегаком” компаниясы мугалимдер жана окуучуларга акысыз таратып жаткан сим-карталарда портал, тиркеме жана WhatsApp кызматы бекер болот. (TSh)
