Борбор Азиянын көпчүлүк аймактарында 8-9-апрелде жааган кар электр энергиясын берүүнү үзгүлтүккө учуратып, дыйкандарды бейпайга салды.
«Азаттыктын» тажик кызматы Дүйшөмбү шаарынын айрым райондорунда жарык өчкөнүн кабарлады. Жергиликтүү дыйкандар айрым мөмө-жемиш бактарынын гүлүн үшүк алып кеткенин билдиришти.
Казакстандын Чымкент шаарында 8 миңдей үй жарыксыз калды.
Өзбекстандын «Аймактык электр тармактары» ишканасы өлкөнүн бир катар аймактарында бак-дарактардын шактары сынып, электр зымдары үзүлгөнүн, учурда оңдоо иштери жүрүп жатканын билдирди.
Кыргызстандын бир катар аймактарына да кар түштү. «Кыргызгидромет» 9-11 апрелде бир топ өрөөндөрдө үшүк жүрөрүн эскертүүдө.
Метеорологдор бул циклон Борбор Азияга Арктика тараптан Сибирь жана Урал аркылуу келгенин билдиришет.
