Жогорку Кеңештин депутаты Аалы Карашев Кыргызстанда коронавируска байланыштуу экономикадагы жоготуу өкмөт эсептегенден да көп болушу мүмкүн экенин билдирди. Бул тууралуу эл өкүлү «Азаттыктын» «Эксперттер талдайт» берүүсүндө айтты.
Аткаруу бийлигинин маалыматы боюнча, өлкө экономикасы ушу тапка чейин 5 млрд. сом зыян тартты. Анын ичинен салыктардан 1,5 миллиард сом, бажы төлөмдөрүнөн 3,8 миллиард сом түшпөй калды. Өкмөттүн баштапкы эсеби боюнча быйыл жыл аягына чейин бюджеттин киреше бөлүгү 30 млрд. сомго чейин толбой калышы мүмкүн.
Аалы Карашев бул үч шаар, үч райондо 15-апрелге чейин киргизилген өзгөчө абалга байланыштуу эсептелгенин, бирок мындай абал 30-апрелге чейин узартылгандыктан, экономикалык жоготуу 30 млрд. сомдон ашарын белгиледи. Ошол эле кезде өкмөттүн так антикризистик программасы жок экенин сындады.
«Вице-премьер-министр «биз бизнести колдош үчүн 14 млрд. сом таптык» деп жарыялады. Ал акча кайда берилет, кимди колдойбуз, кандай жеңилдик берилет, бюджеттен кандай жардам болот деген суроолорго жооп жок. Конкреттүү иштерди көрбөй жатам», - деди Карашев.
Вице-премьер-министр Эркин Асрандиев 12-апрелде ишкерлерди колдош үчүн ички жана тышкы булактардан 14 млрд. сом табылганын билдирген. Бирок акчанын булагын жана кайда жумшаларын тактаган эмес. Ал биринчи кезекте жардамга муктаж жана экономикага көбүрөөк пайда алып келчү ишкерликтин түрлөрү талданып, анын жыйынтыгында финансылык жардам берилерин кошумчалаган. (BTo)
