Бишкекте коронавируска байланыштуу карантин жарыялангандан бери үй-бүлөлүк зомбулук күчөдү. Бул тууралуу 24-апрелде ички иштер министринин орун басары, баш калаанын коменданты Алмазбек Орозалиев билдирди.
Анын айтымында, бул көрсөткүч былтыркы жылдын ушул мезгилине салыштырганда дээрлик 62% жогору.
«2019-жылдын 24-мартынан 24-апрелине чейин 100 факт катталса, быйыл 162 катталды», - деди ал.
Бишкек шаардык милициясынын басма сөз катчысы Улан Жумаков бул көрсөткүч баш калаага таандык экенин тастыктады.
Орозалиев үй-бүлөлүк зомбулуктан жабыркагандар баш калкалоочу кризистик борборлордун ишине уруксат берүү маселесин карап чыгууга макул экенин, бирок ал жайларда коронавирустун жайылбашы үчүн бардык коргонуу шарттары камсыз болушу зарыл экенин билдирди.
2020-жылдын башынан бери Кыргызстанда бир нече аял үй-бүлөлүк зомбулуктан каза тапты. 1-январда Кочкордо 37 жаштагы келин, 3-январда Баткенде 26 жаштагы келин күйөөсүнүн ур-токмогунан көз жумган. 4-январда Каракол шаарында аялына бензин чачып өрттөгөн эркек кармалган. 12-февралда Сокулукта 42 жаштагы келинге күйөөсү бензин чачып, өрттөп жиберген. 6-мартта Бишкекте мурда сот болуп иштеген адам аялын бычактап өлтүргөн. 3-апрелде Бишкекте бир келин төртүнчү кабаттан секирип кетип, ооруканага түшкөн. Социалдык түйүндөрдө ал зордуктоодон качканы айтылууда.
2018-жылы ала качуудан куткарылган Бурулай милициянын имаратында бычакталып өлтүрүлгөн. (RK)
