Коронавирус пандемиясына байланыштуу өлкөдө кооптуу абал сакталып тургандыктан, Бишкек, Жалал-Абад, Ош шаарларында жана Нарын облусунун Ат-Башы районунда өзгөчө абалды 10-майга чейин узартуу тууралуу президенттин жарлыгын парламент бекитип берди.
Аталган жарлыкты мамлекет башчы Сооронбай Жээнбеков 28-апрелде чыгарган.
Коронавирустун жайылышынын алдын алуу максатында Кыргызстанда 22-марттан тартып өзгөчө кырдаал киргизилген. 25-марттан тартып, оору көп катталган Бишкек, Жалал-Абад, Ош шаарларында, Кара-Суу, Ноокат жана Сузак райондорунда өзгөчө абал жарыяланган. 15-апрелден тартып өзгөчө абал Нарын шаарына жана Ат-Башы районуна да киргизилген.
Президенттин 28-апрелдеги жарлыгына ылайык, өзгөчө абал Нарын шаарынан, Кара-Суу, Ноокат жана Сузак райондорунан алынган.
Кыргызстанда коронавируска чалдыккан алгачкы үч киши 18-мартта аныкталган. 30-апрелге карата бул илдетке кабылгандардын саны 746 адамга жетти. 462 адам оорудан айыгып чыкты. 8 киши илдеттен көз жумду. (ZKo)
