Кыргызстанда май майрам күндөрү айрым мекемелердин жана жергиликтүү өз алдынча башкаруу органдарынын кызматкерлери жумушка чыгууга милдеттүү болот. Бул тууралуу 1-майда өкмөттүн маалымат кызматы кабарлады.
Маалыматта “Бул чечим Кыргызстандын аймагына коронавирус инфекциясынын мындан ары жайылышына жол бербөө боюнча иш-чараларды ыкчам жүргүзүү жана экономиканын башка тармактарынын туруктуу иштешин камсыз кылууга багытталды” деп айтылат.
Ошону менен катар бюджеттик мекемелерди тейлеген коммерциялык банктарга да 2, 3 жана 4-майды иш күндөрү деп жарыялоо сунушу берилди.
Кыргызстанда 1-май – Эмгек майрамы, 5-май – Конституция күнү жана 9-май – Улуу Жеңиш күнү. Мыйзам боюнча бул күндөр дем алыш деп аныкталган.
Быйыл 9-май ишемби дем алыш күнүнө туш келгендиктен ал күнкү эс алуу өкмөттүн токтому менен 4-май, дүйшөмбүгө которулган болчу. (RK)
