Бириккен Араб Эмираттарынын бийлиги менен сүйлөшүүлөрдүн натыйжасында 3-майда 180 кыргызстандык Дубай-Бишкек каттамындагы чартердик учак менен мекенине келишти.
Коопсуздук чаралары үчүн жүргүнчүлөрдүн баары аба майданынын имаратына киргизилбестен, учуу тилкесинен тейленип, обсервацияга жөнөтүлдү.
26-апрелде Дубайдан 178 кыргызстандык учуп келген.
Тышкы иштер министрлиги Дубай-Бишкек каттамындагы кийинки чартердик учак 10-майда уюштуруларын маалымдады.
Коронавируска байланыштуу чек аралар жабылгандыктан мекенине кайта албай калган кыргызстандыктардын жагдайы 15-апрелде парламенттин жалпы жыйынында талкууланган негизги маселелердин бири болгон.
Мамлекет башчы Сооронбай Жээнбеков сырттан келе албай жаткан мигранттарды мекенине кайтаруу маселесин биринчи орунга коюп, тиешелүү тармактарга тапшырма берген. (ZKo)
