Улуу Жеңиштин 75 жылдыгына арналган «Жеңиш эстафетасы» Кыргызстандан Тажикстанга өткөрүлүп берилди.
Кыргызстандын Мамлекеттик чек ара кызматынын коомчулук жана ЖМК менен байланыш бөлүмү кабарлагандай, эстафетаны өткөрүп берүү иш-чарасы 7-майда кыргыз-тажик чек ара тилкесиндеги «Бордөбө-автожол» өткөрмө бекетинде болду.
1941-1945-жылдардагы Улуу Ата Мекендик согуштагы жеңиштин 75 жылдыгына арналган эл аралык «Жеңиш эстафетасы» аттуу акция Беларустун Брест жана Орусиянын Мурманск шаарларынан 5-февралда эки багыт боюнча старт алган. Эстафета КМШ өлкөлөрүнүн тышкы чек араларын бойлоп өтүүдө.
Кыргызстандын аймагында «Жеңиш эстафетасы» 2-майдан 7-майга чейин Бишкек жана Ош шаарларынан өттү.
«Жеңиш эстафетасы» акциясы 28-майда Москва шаарында «Белгисиз жоокердин күмбөзү» мемориалдык комплексинин жанында соңуна чыгат. (RK)
