Орусияда соңку бир сутка ичинде 8926 кишиден коронавирус табылды. Бул тууралуу Орусиянын COVID-19 илдетине каршы күрөшүү боюнча ыкчам штабы 18-майда билдирди. Жаңы учурлардын 3238и Москвага туура келет. Бул 30-апрелден берки эң төмөнкү сан. Орусияда соңку үч күндөн бери вирус аныкталган адамдардын саны 10 миңден аша элек.
Өлкөдө эпидемия башталгандан бери 290 миңден ашуун адам коронавируска чалдыкты. Расмий маалыматка ылайык, 2722 киши COVID-19 илдетинен кайтыш болду. Учурда 264 миңдей адам дарыгерлердин көзөмөлүндө турат.
Бир күн мурда Роспотребнадзор мекемесинин башчысы Анна Попова COVID-19 илдетинин жайылышы басаңдап баратканын, бирок орусиялыктар жай бою коомдук жайларда беткап тагынып жүрүү сыяктуу эрежелерди сакташы керек экенин билдирген.
11-майда орус президенти Владимир Путин коронавируска байланыштуу март айынан берки каникулду токтоткон. Бирок карантинди жумшартуу маселесин ар бир аймак өзү чечери кабарланган. Москвадагы чектөөлөр 31-майга чейин узартылган.
