Линктер

ЧУКУЛ КАБАР!
29-сентябрь, 2020 шейшемби, Бишкек убактысы 07:32

Ысык-Көл аймагын убактылуу жабуу маселеси талкууланды


Ысык-Көл.

Ысык-Көл облусунда эпидемиологиялык абал туруктуу, бирок курчуп кетиши ыктымал болуп турат. Бул тууралуу 6-июлда «Азаттыкка» өкмөттүн облустагы ыйгарым укуктуу өкүлүнүн басма сөз катчысы Жаныбек Кожоев билдирди.

Анын айтымында, бүгүн коронавируска каршы ыкчам штабдын отуруму өтүп, облусту жабуу маселеси көтөрүлдү, бирок андай чара көрүлбөй турган болду.

Кожоев белгилегендей, облустун ар бир тургуну өз ден соолугуна өзү кам көрүшү керек деген чечим кабыл алынды.

«Буга чейин инфекция жугузуп алгандар бирин-серин эле катталып жаткан болсо, азыр ондон, кээде 20дан ашып кетип жатат. Ошондуктан абал курчуп кетиши мүмкүн. Облусту жапкан күндө да кайра ачканда экинчи толкун болуп, андан да көп болушу мүмкүн деп бизге дарыгерлер айтышты. Андыктан биз облус тургундарына «райондон районго же башка аймактарга каттаганды коё тургула» деп кайрылмай болдук. Ар бир адам өзүнүн жана жакындарынын коопсуздугу үчүн өзү кам көрсүн деп чечтик. Жергиликтүү бийлик органдары жер-жерлерде түшүндүрүү иштерин жүргүзмөй болушту», - деди ал.

Ысык-Көл облусунда кычкылтек концентраторунан 193 даанасы бар, анын 34ү иштебейт. Ал эми жасалма дем алдыруучу 45 аппараттын 13ү иштебей турат.

Кыргызстанда жалпысынан 18-марттан 6-июлга чейин коронавирус 7691 адамдан табылды (алардын 221и Ысык-Көл облусунда). Оору жугузуп алгандардын 92си кайтыш болду, 2843 бейтап айыгып кетти.

Кыргызстандын башкы өпкө дарыгери Талантбек Сооронбаев азыр өлкөдө сасык тумоо эмес, COVID-19 пандемиясы гана өкүм сүрүп жатканын айткан.

Ысык-Көл облусу - Кыргызстанда жайкысын эс алуучулар эң көп каттаган аймак. (KS)

Пикирлерди көрүңүз (3)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG