Косовонун президенти Хашим Тачи 13-июлда Гаагада эл аралык кылмыштарды иликтеген прокурорлорго көрсөтмө берет.
Косово боюнча атайын прокуратура 24-июнда күтүүсүздөн Тачи жана дагы бир нече кишини, анын ичинде парламенттин мурдагы төрагасы Кадри Веселини 1990-жылдардын соңундагы куралдуу кагылышуу учурундагы адамзатка каршы кылмыштар үчүн айыптаган.
Күнөөсүз экенин айткан Тачи Гаага барып көрсөтмө берүүгө даяр экенин 8-июлда билдирген.
Тачи 1990-жылдарда Сербиянын армиясына каршы турган Косово Боштондук армиясынын кол башчысы болчу.
Сербиянын провинциясы Косоводо 1998-99-жылдары элдик козголоң болуп, Белград аны күч менен баскан.
НАТОнун бомбалоосунан кийин Сербия аскерлерин Косоводон чыгарып кеткен.
Косово 2008-жылы эгемендигин жарыялап, Белград, Москва жана Евробиримдиктин бир нече өлкөсү аны тааныган эмес.
