Линктер

ЧУКУЛ КАБАР!
21-сентябрь, 2020 дүйшөмбү, Бишкек убактысы 06:42

Бегижан Ахмедовдун «Дербиш» китеби кыргыз тилинде жарык көрдү


«Дербиш» китеби.

Кыргызстандык тарыхчы жана жазуучу Бегижан Ахмедовдун «Сайёх» китеби кыргыз тилине которулуп, «Дербиш» деген ат менен жарык көрдү.

Повестти өзбек тилинен кыргыз тилине Эл акыны Маркабай Ааматов которгон.

«"Дербиш" повестинде дин таануу жаатындагы дүйнөлүк мааниге эгедер философиялык, социалдык, адеп-ахлактык маселелер терең камтылган, - деди котормочу чыгарма тууралуу, - Автор татаал жана терең философиялык диний маселелердин тамырын таап, аларды чечүүнүн жолдорун курч окуялуу публицистикалык жанрда ар кыл курактагы окурмандарга көркөм тил менен жеткиликтүү баяндайт».

Бабур атындагы эл аралык сыйлыктын лауреаты Бегижан Ахмедов бул чыгармасы буга чейин орус, тажик, фарси, түрк жана англис тилдерине которулган. Автор чыгарманын өзөгүн минтип белгиледи:

«Чыгармада дүйнөлөшүү доорунун терс көрүнүштөрүнөн жабыркаган ишкер жан дүйнөсүн аруулантыш үчүн Памир-Алай тоолоруна кетип, жаныбарлардын арасында алты ай жашоо кечирип, өзүн өзү, кудайды тааныш үчүн далалаттанган аракеттери элестүү чагылдырылат».

Китептин түп нускадагы алгачкы бет ачары 2019-жылдын 13-ноябрында Брюссел шаарында өткөн. Кыргызчасы «Улуу тоолор» басмаканасында быйыл 3-августта 2000 нуска менен басылып чыкты. (MSd)

XS
SM
MD
LG