Беларус элинин жүрүшү
Аскер кызматкерлери Минскинин борборундагы Улуу Ата мекендик согуш музейин курчоого алышты. Музейдин тегерегинде металл тосмолору орнотулуп, анын жүздөгөн аскер кызматкерлери тосуп турушат. Аскерлердин колдорунда Калашников автоматтары бар. Музейдин жанындагы сейил бакта ондогон аскер машинелери турат.
Беларустагы митингге тилектештик акциялары дүйнөнүн башка өлкөлөрүндө да өтүп жатат
Грузиянын борбору Тбилисиде активисттер Беларус элчилигинин жанында чынжыр болуп чыгышты.
Латвиянын борбору Рига шаарында 400дөй адам беларустарга тилектештигин билдирип чыкты. Акцияга бул мамлекеттин башчысы Эгил Левитс келип кетти. Катышуучулар колуна Беларустун ак-кызыл желегин жана Латвиянын, Литванын, Эстониянын желектерин кармап турушту.
Литвада 50 миңден ашуун адам Вилнюстун борборунан Беларустун чек арасына чейинки 32 чакырым аралыкта тирүү чынжыр болуп турушту. Аларга Литванын президенти Гитанас Науседа келери күтүлүүдө. Ал жарандарды коңшу өлкөнү алмашуу жолунда колдоого чакырган.
Литвадагы бул иш-чара тарыхта «Балтика жолу» деген аталыш менен калган окуялардын 31-жылдыгына карата уюштурулууда. 1989-жылы 23-августта Молотов-Риббентроп пактына кол коюлганына 50 жыл болгон күнү миллиондон ашуун адамдар Вилнюстан Латвия аркылуу Таллинге чейин тирүү чынжыр болуп тизилип чыгышкан. Алар «Балтика ойгонууда» деген ырдын алдында кол кармашып турушкан.
Ага чейин да, андан бери да Европада андай ири иш-чара боло элек. Балтикалыктардын тынч акциясы Гиннестин рекорддор китебине эң узун чынжыр катары кирген, ошондой эле ЮНЕСКОнун тынчтык тизмесине катталган.
«Молотов-Риббентроп пакты» 1939-жылы 23-августта Москвада түзүлгөн. Анын жашыруун протоколдоруна ылайык, Балтика боюндагы айрым өлкөлөр, Финляндия жана башка айрым аймактар СССРдин таасири астында калмак.