Линктер

ЧУКУЛ КАБАР!
24-Июль, 2021 ишемби, Бишкек убактысы 00:23

«Социал-демократтар» партиясы талапкерлердин тизмесин түздү


Сейитбек Атамбаев.

Мурдагы президент Алмазбек Атамбаевдин уулу Сейитбек Атамбаев жетектеген «Социал-демократтар» саясий партиясы 19-августта жыйын өткөрүп, шайлоо алдындагы программасын талкуулады. Ошондой эле жыйында Жогорку Кеңештин депутаттыгына талапкерлердин тизмеси түзүлдү.

Партия азырынча тизмедеги баштапкы талапкерлери тууралуу гана маалымдоодо. Алар:

Сейитбек Атамбаев;

Темирлан Султанбеков;

Кылычбек Султан;

Ирина Карамушкина;

Нурбек Касымбеков.

Cейитбек Атамбаев июнь айында «Социал-демократтар» саясий партиясынын жыйынында партиянын лидери болуп шайланган. Анын айтымында бул партияны атасы 2008-жылы, эгер 2020-жылы парламенттик шайлоо алдында КСДПга тоскоолдук кылса, кошумча вариант катары түзгөн.

Мурунку президент Алмазбек Атамбаев түптөгөн КСДП 2019-жылы экиге бөлүнүп, анын бирин «Атамбаевсиз КСДП» саясий кыймылынын жетекчиси Сагынбек Абдрахманов, ал эми Атамбаевди жактаган тарапты Жогорку Кеңештин депутаты Асел Кодуранова убактылуу жетектеп келди. Бул кызматты ал быйыл 27-майда парламент депутаты Анвар Артыковго өткөрүп берген.

Ал эми «Атамбаевсиз КСДП» кыймылын жетектеген Сагынбек Абдрахманов кийинчерээк КСДПны өз атынан каттоодон өткөргөн. 13-июлда Борбордук шайлоо комиссиясы (БШК) Абдрахманов жетектеген КСДПнын парламенттик шайлоого карата өкүлдөрүн каттоодон баш тарткан. Кийинчерээк сот БШКны Сагынбек Абдрахманов жетектеген КСДПны каттоого милдеттендирген.

Жогорку Кеңештин жетинчи чакырылышына депутаттарды шайлоо 4-октябрга дайындалган. Партиялар 20-августтан кечиктирбей жыйын өткөрүп, талапкерлердин тизмесин жарыялоого тийиш. 24-август күнү кечке чейин талапкерлердин тизмесине байланыштуу тийиштүү документтер БШКга тапшырылып, 4-сентябрга чейин тактоо иштери аякташы керек.

Пандемия шартына байланыштуу БШК партияларга жыйындарды ачык асман алдында өткөрүүнү сунуш кылган. (ZKo)

Пикирлерди көрүңүз (17)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG