Линктер

ЧУКУЛ КАБАР!
16-Сентябрь, 2021 бейшемби, Бишкек убактысы 18:14

Бишкектеги митингдин катышуучулары тарап кетишти


«Биримдик» партиясынын лидери Марат Аманкуловдун эгемендикке байланыштуу сөздөрүнө каршы митинг. Бишкек, Кыргызстан. 27-сентябрь, 2020-жыл.

Бишкек шаарынын борбордук аянтында «Биримдик» партиясынын төрагасы Марат Аманкуловдун эгемендикке байланыштуу сөздөрүнө каршы өткөн нааразылык акциясы эки саатка созулду. «Кул болбо!» аттуу акцияда «Аманкулов, чык эшикке», «Эгемен Кыргызстан», «Кыргыз жери кол тийгис», «Маңкурт болбо», «Эгемендүүлүк, элге!», «Саткындар кетсин!» деген ураандар жаңырды.

Сөз сүйлөгөндөр Аманкуловдун сөзүндө жикчилдик бар экенин айтып, аны жоопкерчиликке тартууну өтүнүштү. Парламенттик шайлоого катышып жаткан «Ата Мекен», «Бир Бол», «Реформа», «Чоң казат» партияларынын өкүлдөрү да сөз алып, саясий жарыштагы атаандашынын кебин айыпташты.

Демонстранттар Улуттук коопсуздук боюнча мамлекеттик комитетке жана Башкы прокуратурага арыз жазып, ага кол коюшту. Акциянын катышуучулары Марат Аманкуловдун сөзүнө юридикалык баа берүүнү талап кылышты.

«Бул - Конституцияга, элге каршы, сепаратисттик билдирүү. "Биримдиктин" мындай позициясы жана идеологиясы партиянын иш-аракети өлкөнүн улуттук коопсуздугуна каршы багытталганын билдирет», - деп айтылат арызда.

Митингге болжол менен 400-500дөй киши катышты. Эркиндик бульварынан жүрүш катары башталган акция саат 14:00дө аяктады.

26-сентябрда Интернетте Марат Аманкуловдун сөзү жазылган кыска видео тараган. Анда ал «Евразиялык Экономикалык Биримдик түзүлгөнү менен калктардын ортосунда байланыш жетишсиз болуп жатканын, ал азырынча элдик уюм эмес экенин» билдирген. Аманкулов андан ары өзү төрагалык кылган «Биримдик» партиясы тууралуу айтып, анын башкы идеясы «Евразиячылык» экенин, алар ошого умтуларын кошумчалайт.

«Биздин 30 жылдык көз карандысыздыгыбыз ойлонууга жана кайтууга мезгил жеткенин көрсөттү. Евразиянын жалпы аймагында бириккен гана мамлекет Евразияда эгемен мамлекет боло алат. Биз, кыргыздар өзүбүздү субъект катары жоготуп албаш үчүн чогуу интеграцияланышыбыз керек», - деген анда Марат Аманкулов.

Бул күнү түштөн кийин Аманкулов билдирүү таратып, видеону чагым деп атаган. Ал видео 2019-жылы Кыргызстан менен Орусиянын Эриш-аркак жылын өткөрүүнүн алдындагы Москвадагы маданий иш-чарада тартылганын айтып, андагы сөздөрү контексттен суурулуп алынганын билдирген.

Жогорку Кеңештин расмий сайтында бул жолугушуу былтыр жыл аягында эмес, быйыл февраль айында өткөнү тууралуу маалымат турат.

Социалдык тармактарда муну Кыргызстандын эгемендигине шек келтирүү катары баалап, сын пикирин айткандар көп болууда. (ErN)

Пикирлерди көрүңүз (1)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG