Журналисттер арасында шайлоонун каржылык ачыктыгы боюнча сынак жарыяланды. Бул тууралуу 30-сентябрда «Азаттыкка» сынакты өткөрүп жаткан «Кыргыз Республикасынын журналисттеринин көз каранды эмес бирикмеси» уюмунун жетекчиси Азамат Касыбеков билдирди.
Анын айтымында, сынак шайлоонун каржылык ачык-айкындуулугу жана инклюзивдүүлүгү деген эки теманы камтыйт.
«Негизги максаттары – шайлоочулардын укуктук маданиятын, медиа материалдардын сапатын жогорулатуу жана журналисттерге дем берүү», - деди ал.
Сынак Борбордук шайлоо комиссиясы (БШК) жана Бириккен Улуттар Уюмунун Өнүктүрүү программасынын Кыргызстандагы өкүлчүлүгү менен чогуу уюштурулуп жатат. Жыйынтыгы 24-октябрда жарыяланат.
Кыргызстанда кезектеги парламенттик шайлоо 4-октябрда өтөт. Бул саясий өнөктүккө карата 61 телекомпания, 27 радиокомпания, 59 гезит-журнал жана 77 интернет-басылма катталган. (RK)