Баш прокурор Өткүрбек Жамшитов кызмат ордунда экендигин, 11-октябрда өздүк курамдын, Бишкек шаарынын, Чүй облусунун райондук прокурорлору менен ыкчам кеңешме өткөргөнүн мекеменин басма сөз кызматы “Азаттыкка” билдирди.
5-6-октябрдагы массалык акциялардан кийин Сыймык Жапыкеев өзүн элдик башкы прокурор кылып дайындаганын партиялаштары кабарлаган. 8-октябрга караган түнү ыктыярчылар Жапыкеевди Башкы прокуратуранын имаратына киргизбей койгону тууралуу видео Интернетке тараган.
Кыргызстанда парламенттик шайлоонун баштапкы жыйынтыгына байланыштуу чыккан 5-октябрдагы нааразылык акциялары массалык тополоң менен коштолуп, митингчилер президенттин аппараты, парламент жайгашкан имаратты, УКМКнын имаратын ээлеп алып, коррупция үчүн айыпталып камакта отурган жоон топ саясатчыларды бошотушкан. Башаламандыкта ар кайсы топтордун мамлекеттик мекемелерге ээлик кылып, кызмат орундарын ээлеп алган фактылар байкалган.
Өлкөдөгү саясий кризиске байланыштуу президентЖээнбеков Бишкек шаарында өзгөчө кырдаал жарыялаган. 10-октябрда Жогорку Кеңештин кезексиз жыйыны Садыр Жапаровдун талапкердигин бекиткен. (BCh)
