Линктер

ЧУКУЛ КАБАР!
28-ноябрь, 2020 ишемби, Бишкек убактысы 08:12

Садыр Жапаров: Декабрдын башында кызматымдан кетип, 10-январда президенттик шайлоого катышам


Садыр Жапаров Кочкордо. 2020-жылдын 25-октябры.

Кыргызстанда президенттик шайлоо 10-январда өтөт жана ага мамлекет башчынын милдетин аткарып жаткан премьер-министр Садыр Жапаров да катышат. Бул тууралуу Жапаровдун 25-октябрда Кочкор районунда жергиликтүү тургундар менен жолугушууда айткан видеосу Интернетте тарады.

«10-январда президенттик шайлоо болот. Мен декабрдын башында бүгүнкү кызматымды тапшырып берип, катардагы адам катары катышам. Өтсөм ажо болом, өтпөсөм сиздердин араңыздарда жөнөкөй эле жаран бойдон калам», - деди ал.

16-октябрда Жапаров Кыргызстанда конституциялык реформаны парламенттик кайра шайлоо өткөндөн кийин гана уюштурса болорун, ал эми президенттик шайлоо «10-январдан ары өтпөшү керек экен, анткени 90 күн ичинде болууга тийиш экенин» айткан.

22-октябрда ал конституциялык реформа өткөнчө Жогорку Кеңештин депутаттарын кайра шайлоону токтото туруу жөнүндө мыйзамга кол койгон.

23-октябрда Жапаров шайлоолор Баш мыйзамды өзгөртүү боюнча референдумдан кийин өтөрүн айткан. Бишкекте өткөн 24-октябрдагы инвестициялык кеңеште «конституциялык реформага барабыз. Конституцияны кабыл алып, анан президентти да, парламенттик да шайлоо мартка чейин өтөт» деген.

Кыргызстанда 4-октябрда кезектеги парламенттик шайлоо өтүп, анын жыйынтыгына нааразы болгон он чакты саясий партия 5-октябрда Бишкекте митинг өткөргөн. Митинг башаламандыкка айланып, кийин бийликтин алмашуусуна алып келген. Азыр президенттин милдетин башаламандык убагында тарапкерлери түрмөдөн бошотуп алган премьер-министр Жапаров аткарып жатат.

Парламенттик шайлоонун баштапкы жыйынтыгын 9-октябрда жокко чыгарган БШК кайра шайлоону 20-октябрда белгилеген. Бул чечимди Бишкектин Административдик соту жокко чыгарган. БШК соттун бул чечимине каршы даттанганы жатат. (RK)

Пикирлерди көрүңүз (23)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG