«Бишкек» эркин экономикалык аймагынын башкы директору Дүйшөн Ирсалиев ээлеген кызматынан бошотулду. Тийиштүү буйрукка премьер-министр Садыр Жапаров кол койгонун өкмөттүн аппараты кабарлады.
Дүйшөн Ирсалиев «Бишкек» эркин экономикалык аймагын 2016-жылдан бери башкарып келаткан. Ага чейин 1996-жылдан 2008-жылга чейин Эмил Ибраимов, 2008-жылдан 2010-жылга чейин Азим Исабеков жетектеген. 2010-жылдан 2011-жылга чейин кийин Бишкекке мэр болгон, кийин камакка алынып, андан чыккандан кийин издөө жарыяланган Албек Ибраимов башкарган. Андан кийин бул кызматты кыска мөөнөт Мирбек Асанакунов, Бактыбек Кунаев, 2012-жылдан 2015-жылга чейин Орозбек Нусувалиев башкарган.
«Бишкек» эркин экономикалык аймагы алгач «Манас» эл аралык аэропортунун жакасындагы Ак-Чий аянтындагы жерди ээлеп турат. Анын аянты 203,09 гектарды түзгөн. Кийин ага баш калаанын жогорку тарабынан («ВДНХ») 43 гектар, Кара-Балта шаарынан 100 гектар кошулган. Ошентип аймактын жалпы аянты 346,09 гектарды түзүп калган. (ErN)
