28-октбярда Бишкек мэриясынын алдында вице-мэрлик кызматтан алынган Алымбек Абдылдаев менен Виктория Мозгачёванын тарапкерлери митингге чогулуп, аларды кайра ордуна коюуну талап кылышты.
50дөн ашык адам «Иштеткиле!», «Вице-мэрлерди кайтаргыла!» деген транспаранттарды кармап турушту.
Бишкек шаарынын мэринин милдетин аткаруучу Балбак Түлөбаев алар менен жолугуп, арызын укту. Кийин алардын делегаттарын ичкери кирип сүйлөшүүгө чакырды.
Бишкектин төрт вице-мэринин экөө - турак жай, коммуналдык чарба маселелерин тейлеген орун басары Алымбек Абдылдаев жана социалдык саясатка жооптуу вице-мэр Виктория Мозгачёва кечээ, 27-октябрда кызматтан кеткен. Алардын арызын Балбак Түлөбаев канааттандырган.
Анын алдында «Бишкекжылуулукэнерго» ишканасынын директору болгон Мозгачёва вице-мэрликке туура үч ай мурда, ал эми «Бишкекжарык» ишканасын жетектеп келген Алымбек Абдылдаев 1,5 ай мурда дайындалган болчу.
Баш калаанын биринчи вице-мэринен тышкары дагы төртөө, жалпысынан беш вице-мэри бар.
27-октябрда президенттин милдетин аткаруучу өкмөт башчы Садыр Жапаровдун буйругу менен Бишкектин мэринин милдетин аткаруучу болуп буга чейин өкмөттүн Ысык-Көл облусундагы өкүлү болуп иштеп жаткан Балбак Түлөбаев дайындалган. (ErN)
