Доллардын кыргыз сомуна карата курсу өйдөлөп кетишине ага суроо-талап күчөгөнү себеп болууда. Бул тууралуу Улуттук банк 2-ноябрда маалымдады. Мекеме «Tazabek» басылмасына билдиргендей, 1993-жылдан бери чет өлкөлүк валюталардын курсу суроо-талапка жана сунушка жараша калыптанып келет, башкы банк аны аныктабайт, болгону орчундуу өзгөрүүлөрдү жумшартууга аракет кылат.
Бул жолу доллардын кымбаттап кетишине негизинен суроо-талап күчөгөнү, чийкизаттын кымбатташы, коронавируска байланыштуу айрым өлкөлөр чектөө киргизгени себеп болгону айтылды.
2-ноябрга карата Улуттук банк доллардын курсун 81,80 сом деп аныктаган, бирок акча алмаштыруучу жайларда сатуу курсу дээрлик эки сомго жогорулап, 83 сомго жетти. Бүгүн, 3-ноябрга карата да доллардын расмий курсу 81,80 болуп турат.
Быйыл жыл башынан бери Кыргызстанда доллар 12-13 сомго көтөрүлүп, ошого жараша азык-түлүк жана башка товарлар да кымбаттап кетти. (RK)
