Линктер

ЧУКУЛ КАБАР!
27-Сентябрь, 2021 дүйшөмбү, Бишкек убактысы 19:40

Конституциялык реформага каршы кол топтоло баштады


Кыргызстандын Конституциясы.

Кыргызстанда Конституциянын жаңы долбооруна каршы кол чогултуу башталды. Бул тууралуу 23-ноябрда юристтер тобу Бишкекте «Шашылыш конституциялык реформа: мыйзамдуулук жана негиздүүлүк» деген темада өткөргөн брифингде билдиришти.

Юристтердин айтымында, кол чогултуу электрондук ыкма менен www.stop-referendum-kg.com сайты аркылуу жүрүп жатат.

Демилгечилер референдум тууралуу мыйзам долбоорун чакыртып алуу жана парламенттик шайлоо өткөрүү үчүн кеминде жарым миллион кол чогултууну көздөп жатышканын маалымдашты.

Конституциялык укук боюнча эксперт, юридика илимдеринин доктору Сания Токтогазиева буларды айтты:

«Эгерде азыр биз конституциялык реформага ушундай жол менен барсак, анда бир-эки жылдан кийин кайра эле ушул жолго түшөбүз. Кайра эле Кыргызстан мамлекеттик төңкөрүштүн барымтасында кала берет».

Конституциянын жаңы долбоору иштелип чыкканы 17-ноябрда белгилүү болгон. Аны референдумга чыгарыш үчүн коомдук талкууга коюу тууралуу мыйзам долбооруна 80 депутат демилгечи экени расмий жарыяланды. Кийин ал депутаттардын айрымдары демилгечи болуудан баш тартканын билдиришти жана Баш мыйзамдын долбоорун жазбаганын, аны көрбөгөнүн, ага автор эмес экенин айтып чыгышты.

20-ноябрда президенттин милдетин аткаруучунун жарлыгы менен 80ден ашуун окумуштуудан жана коомдук ишмерден турган Конституциялык кеңешме түзүлдү. Ал кеңешмеге Конституциянын жаңы долбоорун талкуулоо жана парламентке сунуш киргизүү милдети жүктөлдү. Кеңешменин төрагасы Бекбосун Бөрүбашев Конституциялык кеңешменин иши 15-20 күнгө созуларын болжоду.

Жаңы Конституциянын тарапкерлери, эгер ал кабыл алынса, Кыргызстанда бийликтин жоопкерчилиги күчөй турганын айтып жатышат, ал эми оппоненттер өлкөдө авторитардык бийлик орношу ыктымал деген кооптонуусун билдирүүдө. (RK)

Пикирлерди көрүңүз (8)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
Бул шерине жабылды, эми талкуу "Фейсбуктагы" барагыбызда (Azattyk.unalgysy) уланат.

XS
SM
MD
LG