Атайын комиссия коронавирус жугузуп алган дагы 2550 дарыгердин кенемте төлөп берүү тууралуу арызын карап жатат. Бул жөнүндө 26-ноябрда Коронавируска каршы ыкчам штаб кабарлады.
Штабдын маалыматына караганда, бул оорудан каза болгон дагы төрт медицина кызматкеринин үй-бүлөсүнө кенемте төлөө маселеси да каралууда.
Буга чейин 479 дарыгерге 200 миң сомдон, каза болгон 29 кызматкердин үй-бүлөсүнө 1 миллион сомдон төлөнүп берилген.
26-ноябрга карата Кыргызстанда COVID-19 вирусу 71 миңден ашуун кишиге жукту, алардын 1251и каза болду.
Оору жуккандардын арасынан 3858и медицина кызматкери. Алардын 3568и айыгып чыкты. Каза болгон дарыгерлердин саны 80ден ашты. (RK)
