Орусияда күйүүчү май кымбаттап, Казакстандан мунай экспорту токтогону үчүн Кыргызстанда бензиндин баасы көтөрүлдү. Жыл башынан бери күйүүчү жана майлоочу май 7 сомго чейин кымбаттап кетти. Жогорку Кеңештин депутаты Алиярбек Абжалиевге "Мыйзамсыз баюу" беренеси менен сотко чейинки териштирүү башталды. 54 жаштагы Абжалиев экс-президент Сооронбай Жээнбековдун кудасы. Арменияда саясий кризис уланууда. Ереванда премьер-министр Никол Пашиняндын отставкасын талап кылгандар өкмөт имаратына кирип барышты. Пашинян өз тарапкерлерин жүрүшкө чакырды.