Линктер

ЧУКУЛ КАБАР!
27-Сентябрь, 2021 дүйшөмбү, Бишкек убактысы 16:06

Крестинин: футболчулар түшүнүксүз жагдайда четтетилди

Бүгүн, 7-июнда Жапониянын Осака шаарында Кыргызстан менен Монголиянын футбол боюнча улуттук курама командалары футбол боюнча Дүйнө чемпионатына жана Азия кубогуна тандоо оюндарында беттешти. Оюн 0:1 эсебинде монгол футболчуларынын пайдасына аяктады.


Кыргызстан - Монголия футбол командаларынын беттеши. 7-июнь, 2021-жыл. Осака, Жапония.

Жапониянын Осака шаарында Кыргызстандын футбол боюнча улуттук курама командасы Монголияга 0:1 эсебинде жеңилди.

Беттештин жалгыз голун монголиялык фулболчу Мижиддорж Оюнбаатар киргизди.

Аталган оюн футбол боюнча 2022-жылдагы Дүйнө чемпионатына жана 2023-жылдагы Азия кубогуна тандоо оюндарынын 2-раундунун алкагында болду.

Коронавирустан улам Кыргызстандын дарбазачылары бул оюнга чыгарылган жок. Жапон өкмөтүнүн ооруга каршы саясатына ылайык, жалпы машыктыруучулар штабы, администрация, оюнчу Бекжан Сагынбаев, дарбазачылар Эржан Токотаев, Кутман Кадырбеков жана Валерий Кашуба коронавирус илдетине чалдыкты деп шектелгендердин тизмесине киргендиктен, кыргыз футболчулары дарбазачысыз оюн талаасына чыгууга мажбур болушту. Кыргызстандын футбол биримдиги бул тууралуу маалымат командага оюн башталарга эки саат калганда гана белгилүү болгонун маалымдады. Дарбазачы катары коргоочу Айзар Акматов ойноду.

Кыргызстандын футбол боюнча улуттук курама командасынын башкы машыктыруучусу Александр Крестинин оюндун жыйынтыгы тууралуу төмөнкүдөй пикирин билдирди:

"Бүгүнкү оюндарда жеңишке жетишкен Монголия жана Жапония командаларын куттуктайм. Топко көбүрөк ээлик кылып, оюндун дээрлик бардык бөлүгүндө чабуул жасадык. Тилекке каршы, айып аянтында жеткиликтүү агрессия көрсөтүлбөй калды. Ошондуктан жеңилдик",- деди Крестинин.

Ал ошондой эле коронавируска байланыштуу кырдаалды ачыктап берүүсүн өтүнгөн журналисттин суроосуна:

"Бардыгыбыз тапшырган тесттин жыйынтыгы таза болчу. Бирок беш кишини оюнга катыштырышкан жок. Аны силердин уюштуруучулар түшүндүрүп, сырын ачып беришсин. Мен кайдан билем? Бардыгынын тең тести терс чыкты. Бирок оюнга чейин үч дарбазачыны жана эки футболчуну четтетишти. Бул кандай?",- деп собол менен жооп берди.

Бул күнү Кыргызстан - Монголия беттешинен сырткары F тайпасында Жапония менен Тажикстандын курама командалары беттешип, 4:1 эсебинде талаа ээлери жеңишке жетти.

F тайпасында 2-раунддагы турнирдик таблицада жети оюндан кийин 21 упай топтогон Жапония көч башында. Жети оюнда 10 упай топтогон Тажикстан 2-катарда, алты оюндан кийин жети упай эсебинде бар Кыргызстан 3-орундан жылган жок.

Акыркы оюнда Кыргызстандын курама командасын жеңген Монголия алты упай топтоп, Мьянмага теңелди.

Футбол боюнча дүйнө чемпионатына тандоо оюндарынын экинчи айлампасы 2020-жылы жазында өтмөк. Коронавирус пандемиясынан улам оюндар белгисиз мөөнөткө жылдырылган. Бир жарым жылдык тыныгуудан кийин жанданган беттештер борборлоштурулган тартипте өтүп, командалар мурдагыдай үйдө жана конокто эмес, бир аймакта ойноп, жолдомо үчүн ат салышат.

Кыргызстан бөлүнгөн F тайпасындагы оюндардын бардыгы Жапониянын Осака шаарында болот. Кыргыз футболчулары 11-июнда Мьянма, 15-июнда Жапония оюнчулары менен беттешет.

2022-жылы Катарда өтө турган Дүйнө чемпионатына жана 2023-жылы Кытайда өтчү Азия кубогуна тандоо оюндарынын алкагында Азия чөлкөмүнүн 40 командасы сегиз тайпага бөлүнүп ойноп жатат.

Мелдештер 2019-жылдын 5-сентябрында башталган. Тандоо мелдештеринин жыйынтыгында сегиз тайпанын жеңүүчүсү жана экинчи орунду ээлеген төрт мыкты команда акыркы тандоо оюндарына жолдомо алышат.

Беттеш аяктады. Кыргызстан - Монголия 0:1. Оюндагы голдун автору Оюунбаатар Мижидорж (34-мүнөт). Алдыда кыргыз футболчулары 11-июнда Мьянма, 15-июнда Жапония оюнчулары менен беттешет.

Учурда F тайпасында 2-раунддагы турнирдик таблицада алты оюндан кийин 18 упай топтогон Жапония көч башында. Алты оюнда 10 упай топтогон Тажикстан 2-катарда, алты оюндан кийин жети упай эсебинде бар Кыргызстан 3-орунда бара жатат. Алты оюндан кийин Мьянма алты упайга ээ болгон. Сегиз оюнда эки жолу жеңишке жеткен Монголияда алты упай бар.

Бир күн мурда Кыргызстандын футбол командасынын башкы машыктыруучусу Александр Крестинин Жапонияда пандемиядан улам машыгууга мүмкүн болбой жатканын билдирип чыккан.

Футбол федерациясынын сайтындагы маалыматка караганда, кыргызстандык футболчулар Бишкектен тест тапшырганда баары таза чыккан. Жапонияда спортчулардын биринен "вирус аныкталды" деген негиз менен жалпы командага машыгууга уруксат берилген эмес:

"Биз болгону бир эле жолу машыктык. Ага да баарынын тест жыйынтыгы жакшы чыкса да, команда толук курамда катыша алган жок. Бир адамдан вирус аныкталды деп бүтүндөй команданы машыгуудан четтетип коюп атышат", - деди Крестинин.

Кыргызстандын футбол боюнча улуттук курама командасы 2022-жылы боло турган Дүйнө чемпионатына тандоо оюндарына катышуу үчүн 2-июнда Жапониянын Осака шаарына жөнөп кеткен.

Бүгүнкү Монголия курама командасы менен болгон беттештен сырткары кыргыз футболчулары 11-июнда Мьянма жана 15-июнда Жапония оюнчулары менен ойнойт.

Беттеш Кыргызстандын аймагында КТРК Спорт, Кыргыз Спорт ТВ телеканалдарында жана Sportrecs интернет платформасында түз эфирде көрсөтүлүп жатат. Күйөрмандар үчүн Бишкектеги «VEFA» жана «ASIA MALL» соода борборлорунда фан-зоналар уюштурулган.

Дагы жүктөңүз

Facebook шеринеси

XS
SM
MD
LG