Кыргызстандын президенти Садыр Жапаров 9-11-июнь күндөрү Түркияда расмий иш сапары менен болот. Анын алкагында түрк президенти Режеп Тайып Эрдоган баштаган жетекчилер менен жолугат. Ошондой эле эки өлкөнүн Стратегиялык кызматташуунун жогорку кеңешинин V жыйыны президенттердин катышуусунда өтөт.
Андан сырткары Түрк тилдүү мамлекеттердин кызматташуу кеңешинин (ТМКК) алкагында маселелер талкууланат,, бизнес форум болот. Бул тууралуу 7-июнда расмий кабарланды.
Жапаровдун сапары теги түркиялык кыргыз жараны Орхан Инандынын дайынсыз жоголгон учуруна туш келди.
Кыргызстанда 20дан ашуун "Сапат" жеке лицейинин, эл аралык "Ала-Тоо" университетинин негиздөөчүлөрүнүн бири Орхан Инанды 1-июнга караган түнү жоголгон. Ал Түркияда террорчу деп таанылгандыктан, жарандык коомдо "анын жоголушуна Анкаранын колу бар" деген божомолдор айтылууда. Түркия буга комментарий бере элек.
