Борбордук шайлоо комиссиясы (БШК) Токмок шаардык кеңешине өткөн кайра шайлоонун жыйынтыгын таанып, жаңы депутаттардын тизмесин каттоого алды. 2-августтагы отурумунда Боршайком аларга депутаттык күбөлүк жана төш белги тапшыруу тууралуу чечим чыгарды.
Жети пайыздык босого ченинен шайлоого катышкан жети саясий партиянын бешөө өтө алды. Натыйжада «Бирге-Вместе» партиясына 9, «Эмгекке» сегиз, «Асыл Мурас-Жаштарга» беш, «Патриот Ынтымагына» беш жана «Эл Биримдигине» төрт мандат тийди.
Шайлоодон кийин айрым партиялар добуш сатып алууга айыпталышкан.
Кыргызстанда жергиликтүү кеңештерге шайлоо быйыл 11-апрелде өтүп, жыйынтыгында Бишкек, Ош жана Токмок шаарларындагы добуш берүүнүн жыйынтыгы жокко чыгарылган. Кайра шайлоо 11-июлда өткөн. Бишкек менен Ош шаардык кеңешинде 45тен, Токмок шаардык кеңешинде 31 орун бар. БШК Бишкектеги жана Оштогу кайра шайлоонун жыйынтыгын да расмий түрдө тааныган. (RK)
Facebook шеринеси